تنقسم حياتي كأي رجل لثلاث مراحل
الماضي مرحلة الكلوت
"شي لله يا چيل"
الطفولة الأنبهار بكل جديد
مع الكثير من المبالغة والخيال
الحاضر مرحلة البوكسر
"أصحابك زي بوكسراتك(غاليين فشخ)"
زمان كنا بنشتري الكلوتات الجيل بالدستة
و أعتقد كانوا مريحين وزي الفل و بحوالي ٣٠ جينيه الدستة
دلوقتي البوكسر بيتراوح سعره ما بين ٦٠ جنيه و ٩٠ جنيه
ده الواحد
و ده بيفسر ظاهرة تسقيط البنطلونات
بس والله مش كلنا بنسقط مع أن بوكسرتنا غالية ، مش هنسى واحد صحبي أشترى بوكسر أرمانيArmani بحوالي ٦٠ دولار
و ساعتها كلنا أجتمعنا كأصحابه و هدفنا نقنعه أنه لازم يسقط البنطلون
قلبنا عليه برضوا ما عدا الواد أسترالي جه الأجتماع عشان يقنعه يسلفوا البوكسر و لما قلنالوا أنت معفن حلف أنه كان هيلبسوا من فوق البنطلون زي سوبر مان
وزي ما أنتوا فهمتوا في المرحلة ديه المظاهر بتبقى مهمة جدا
المستقبل مرحلة اللباس الزي الرسمي للبيت
"ولا لباس نضيف يا ولية؟"
و في الوقت ده أنت ضاربها جازمة المهم البيت والعيال
و اللباس بتجيوبوا من العتبة ب ٢،٥ مع دستة الكلوتات الجيل للعيال
و البنطلون لازم يغطي السرة عشان ميبقاش في أي أحتمال أن حد ياخد بالوا من نوع اللباس
بس لما سافرت لاحظت أن الواحد مش مرتبط بسن عشان يكون كلوت أو بوكسر أو لباس
أصل الحكاية أن في ناس بتيجي هنا تحسسك أنها جت الجنة
و أنها ما عشتش ولا شافت قبل كده و دول الكلوتات
في ناس قابلتها هنا و ده بعض أجزاء الحوار
شفت الجمبري هنا أد أيه مفيش منوا في مصر ده هه ؟
شفت الدريف ثرو ده أختراع مفيش منوا في مصر؟
شفت أنواع العربيات متلاقيش زيها في مصر ؟
و لما لقيت فرصة أتكلم أخيرا
شفت الجمبري و أكيد في منوا في مصر و ياما كلت منوا في فيش ماركت و حلقة السمك و قدورة و كان أكبر من ده كمان
الدريف ثرو مرمي في المعادي بقالوا سنين و ما شاء الله بتوع المعادي فرحانين بيه زيكوا بالضبط لحد ما عملوا دريف ثرو تاني في أكتوبر والتجمع
شفت كل العربيات ديه في مصر ، الحمدلله الحرامية كتير عندنا و العربيات ديه شخصيا بتجيلنا جامعة الدول و بيعملوا بيها اللي مينفعش يعملوه هنا
ناقص تقولي شفت البني أدميين هنا عندكم بني أدميين في مصر؟
هو أنت حاسب اللي في مصر دول …………….
وقبل ما يكمل كنت قمت مشيت
النوع التاني البوكسرات
أيه ده مالك فرحان بالمترو كده ليه ده عادي يعني أنا على فكرة عمري ما ركبتوا أنا على طول بركب البورش بتاعة بابا.
أيه ده أنت هتعد تتصور قدام برج خليفة و تستنى النافورة الراقصة فاكس أوي على فكرة
سينما أي ماكس أيه اللي أنت عايز تروحها أيه الهبل ده
أنت بتصور أيه لعب أطفال و هاري بوتر و باتمان يا أبني أكبر بقى
و ده ردي
عشان المترو ده يا تحفة أجدد مترو في العالم، من غير سواق ، متصمم ومتصنع بالكامل في اليابان و جاي لا مؤخذة على التركيب
وبيوريك لاند سكيب عمرك ما هتشوفوا على الهاي واي في عربية الوالد
برج خليفة تصميمه فعلا مبهر وحاليا هو أطول برج في العالم ، في ناس بتيجي البلد مخصوص علشان بس تتصور قدامه وتتفرج على النافورة اللي عنده
آي ماكس ديه دور عرض سينمائي للأسف مفيش منها في مصر بتعرض نسخة خاصة من بعض الأفلام الأمريكي
مينفعش تتعرض على أي شاشة عرض تانية بتبقى عالية الجودة و تجربة مختلفة عن الفيلم العادي
ديه مش لعب أطفال ديه أكشن فيجرز
وديه حاجات أنا بحبها وليا أصحابي حابب أبعتلهم الصور ديه
وفي النوع التالت وهما طبعا اللبسة
وديه مثال على محادثة:
……………………………………………………..
………………………………………….
وده ردي
؟؟؟؟؟!!!!!
أه هفهمكم عشان كل واحد فيهم كان في الأصل لباس
فهما مهتموش أنهم يقابلوني أو حتى يسلموا عليا
غالبا خايفيين أطلب منهم حاجة :)
ناس أصيلة
بس أكيد لازم عندها ظروف
طب أنا المفروض أتعامل أزاي
الكلوت : منفرط من كتر الأنبهار
البوكسر:الشاب الشيك اللي شاف الكلام ده كله قبل كده و عادي يعني
اللباس: أمسح كل اللي عندك على الفيس بوك و أبتدي صفحة جديدة …… حرفيا
اللي يعرفني يعرف أني عمري ما كنت لباس
;)
بس ساعات ببقى بوكسر وسط بعض الأصدقاء كان أسمي بقسماط
و كان يوم ما نيجي نخرج و أنا اللي هختار المكان كانوا يكلموا بعض و يسألوا : ليك في البقسماط ؟
السؤال معناه أن باسم هو اللي هيختار مكان الخروجة فأعمل حسابك أنك هترجع بيتكوا مفلس
ماشي ولا عندك جمعية الشهر ده ؟
مش فكرة أني بحب الأماكن الغالية
بس بحب الأماكن الحلوة
اللي عادة بتكون غالية …….. صدفة مش أكتر
وهناك بتعامل بتناكة شديدة جدا
بفلوسي يا كلاب
و مفيش حاجة ببهرني
وساعات ببقى كلوت
أتفرج عليا و أنا بحكي عن فيلم عجبني
أو حتى عن مكان عجبني أنبهار مش طبيعي زي الأطفال بالضبط
طب شوفني و أنا باكل أو بتكلم عن الأكل
أنا بستمتع وبنبهر بالأكل
الأختيار مش صعب
أنا فعلا أنبهرت
بمحطات البص المكيفة اللي مفيش زيها في العالم
بالأكل
كنتاكي مثلا هنا مش طبيعي بجد حرام عليهم اللي بيعملوه فينا فى مصر
بس أحب أطمنكم ماك هنا زي بتاع مصر بالضبط و ده شيئ رائع أنهم محافظيين على نفس المستوى من السوء في العالم كله
أنبهرت بالنظام
أنبهرت بأن الناس بتضحك في وشك بجد
يا جماعة الناس ديه عملت مجهود عشان تبهرك ، عشان تبهر أي حد من أي مكان في العالم
ليه التناكة أفرح أنبسط
آستمتع
محدش هيقول عليك كول وجامد عشان مش مستمتع
بس برضوا متزودهاش ما أنت مش جي من الأحراش أنت جي من مصر
فأتلم شوية و خليك فخور ببلدك مع تقديرك للحاجات اللي تستحق التقدير هنا
و أستمتاعك بيها
أنا هفضل منبهر وبتاج نفسي في كل مكان بروحوا ببقى فرحان أني فيه
و هتصور صور كتير عشان صحابي اللي كان نفسي يبقوا هنا يشوفوها
مش تنطيط على خلق الله
أنا خايف من اليوم اللي هتعود فيه و هبطل أنبهر لأني ساعتها هبقى لباس
ما تبقاش كلوت
ولابوكسر ولا لباس
خليك بني آدم عندك أحساس
No comments:
Post a Comment